Rafael Palacios | Diputáu de Podemos Asturies na Xunta Xeneral

publicado en La Nueva España del 07.09.2020

Esti añu’l Día d’Asturies ta condicionáu pola estrañeza y la escepcionalidá qu’impón la crisis sanitaria global de la COVID-19. Nun queda otra que suspender o reducir a la mínima espresión los actos y les actividaes que yeren una ocasión afayadiza pa xuntanos a festeyar lo que fuimos y lo que somos, pa recordar a la nuestra xente, muncha xente mozo, que tuvo que marchar de casa porque equí nun atopó oportunidaes y que ta na emigración, y pa reivindicar lo que queremos ser como pueblu nel futuru.

La prudencia y la responsabilidá individual y colectiva son más importantes que nunca pa facer frente a una emerxencia sanitaria que naide esperaba, qu’a naide favorez, que se ta allargando nel tiempu y de la que tenemos que salir nes meyores condiciones posibles, non solo velando pola salú pública sinon tamién actuando a tolos niveles pa combatir los efectos d’esta crisis, cola premisa de que nengún colectivu o persona tien que quedase atrás o al marxe.

Les crisis traen amenaces, pero tamién oportunidaes pa correxir errores y pa meyorar les coses. Esta ofreznos la oportunidá d’empezar a construir, dende’l respetu y el reconocimientu de les nueses diferencies, una Asturies más compacta, más social, más solidaria. Más allá de desacuerdos ideolóxicos o de cualquier otru tipu, ye evidente que’l millón escasu de persones que vivimos ente’l mar y el cordal Cantábricu, ente les ríes del Eo y de Tina Mayor, compartimos el deséu de ver que la nuestra tierra progresa y espoxiga, y l’oxetivu de facer d’ella un llugar dignu y acoyedor pa toles persones qu’equí tamos. Nun pue ser que vengan los turistes a conocer y a almirar el patrimoniu natural y cultural del nuestru país mientres equí se desprecia. Nun pue ser que l’asturianu y el gallego-asturiano, como llingües propies d’Asturies, nun tengan el reconocimientu de la oficialidá pa formar parte del procesu de reconstrucción social y económicu. La nueva normalidá tien que traer la oficialidá. Porque volver al estatus anterior ye volver a un estáu d’anormalidá onde les llingües d’Asturies son les úniques del Estáu español que nun son oficiales.

Nun ye hora de mezquindaes. Nesti momentu de la historia, tolos partíos políticos, ensin escepción, tienen que dexar de llau intereses particulares y tacticismos, pensar n’Asturies y ponese al serviciu d’Asturies. Nun hai nengún partíu políticu más importante que les propies asturianes y asturianos. Nun hai nengún partíu políticu más importante que la propia Asturies. Ye’l momentu de sumar voluntaes con xenerosidá y devolver a la ciudadanía la esperanza, l’optimismu, l’autoestima, l’arguyu, el dinamismu y la capacidá de respuesta.

Ye un retu que nun esclui a naide, pero quienes anguaño representamos la soberanía popular nes instituciones asturianes tenemos el deber y la responsabilidá añadida de ponenos al frente pa esplorar toles víes posibles de diálogu y consensuar acuerdos sociales que garanticen derechos y oportunidaes de futuru. Esti Día d’Asturies ha de ser momentu pa la reflexón, tamién pa l’acción. Ta echando a andar un cursu políticu que va ser determinante pal futuru d’Asturies. L’aritmética parlamentaria obliga a les fuerces progresistes y d’izquierdes de la Xunta Xeneral a tomar la iniciativa, a nun desaprovechar nin marafundiar esi capital electoral del que nos fizo depositarios la ciudadanía asturiana.

Como vengo defendiendo nos últimos meses, Asturies necesita, güei más que nunca, una política de llargu aliendu que nos ayude a remontar esta situación abegosa na que llueve sobre moyao: a los efectos d’una crisis económica endémica que dende va años muerde con saña les carnes del nuesu texíu productivu vienen a sumase agora los efectos, tovía incalculables, d’esta crisis pandémica. El retu ye grande pal nuestru país, como grande ha de ser tamién l’esfuerzu p’atopar soluciones eficaces: facer una Asturies pa vivir y trabayar, qu’encare’l futuru de forma colectiva, confiando nes sos posibilidaes de progresu y desarrollu, buscando ensin complexos el so sitiu nel mundu y siendo verdaderamente protagonista y dueña del so porvenir.