- Cambia Avilés presentará al Plenu del Conceyu d’Avilés, a petición de la Xunta Pola Defensa de la Llingua Asturiana, una moción sobre la reforma del Estatutu d’Autonomía d’Asturies y la oficialidá del asturianu.
La Xunta Pola Defensa de la Llingua Asturiana vien impulsando cuantayá plataformes y movimientos pa dar puxu a la dignificación y normalización social del asturianu, ente los que destaquen el Conceyu Abiertu pola Oficialidá, a principios d’esti sieglu, o los más recién Conceyos pola Oficialidá y Proyectu 2018 pola Oficialidá, siempre cola mira de facer caltriar la idea de que l’alcuerdu necesariu pa la declaración de la oficialidá tien que se construir activamente na Xunta Xeneral.
Güei más que nunca, la reflexón abierta dientro de los partíos políticos y la mayoría parllamentaria favorable que por fin esiste dibuxen un escenariu políticu nuevu que tien que valir p’avanzar nesti camín. El Día de les Lletres Asturianes d’esti añu, que se celebra’l 2 d’ochobre por mor del andanciu que carecemos, va ser un bon momentu pa que les corporaciones municipales-y dean un emburrión al espíritu de protección del patrimoniu llingüísticu d’Asturies y de defensa de los derechos llingüísticos de los y les falantes d’asturianu y de gallego-asturianu. Por too esto, desde CAMBIA AVILÉS proponemos al Plenu del Conceyu d’ Avilés, l’aprobación d’esta moción.
